Сарыкөл ауданында, Крылов ауылына жақын жерде жалпы ұлттық маңызы бар киелі нысан - Барақ Жанұзақұлы батырдың кесенесі орналасқан. Ол жастайынан өзінің емшілік және болашақты болжайтын қасиеттерімен әулие атанған. Барақ батыр қазақ жерлерін жоңғар және қалмақ шапқыншыларынан азат ету шайқастарына қатысқан. Өзінің адал қызметімен Абылай ханның сеніміне ие болған.

Екі ғасырдан бері Барақ батырдың бейіті жыл сайын көпшілік зиярат ететін орынға айналған. 1996 жылы жаңартылған кесене салтанатты түрде ашылды. Онда Барақ батырды қойған уақыттан бері сақталған, араб қаріптерімен жазылған тас тақта бар. Ескерткіш кешеніне зиярат жасайтын үй және құдық кіреді.