2018 жылы 27 шілдеде Кәкен Күсеновтің «Суреттер сөйлейді» атты дербес көрмесінің ашылуы болды. Суретші көрмені өзінің 60 жасқа толу мерейтойына орай ұйымдастырды. Дербес көрмеге 30-дан астам кескіндеме туындылары қойылды.
Кәкен Күсенов Алматы облысы Ақсу ауданының Арасан ауылында дүниеге келген. Орта мектепті тәмамдағаннан кейін «Қапал-Арасан» шипажайында, Торғай боксит кен басқармасында және өзге де кәсіпорындарда суретші-көркемдеушіболып жұмыс істеді. 1989 жылдан 1994 жылға дейін Арқалық педагогикалық институтында көркем-графика бөлімінде оқыды, оқуды аяқтағаннан кейін кескіндеме кафедрасында оқытушы болып жұмыс істеді, алғашқы дербес көрмесі де сол оқу орнында ашылды.
Суретші көрермендермен сөз арқылы емес салған суреттері арқылы тілдеседі, себебі ол айтқысы келген ойын сызықтармен, түстермен кенеп бетіне өте айқын түсіреді. Ол туындыларында өзінің әлеммен, табиғатпен, өз өзімен бірігуін тұрақты іздейді және сол сәттерді бейнелейді.
«Суреттер сөйлейді» көрмесі бір ай бойы жұмыс істейді.
