30 наурыз 2017 жылы Қостанай облыстық тарихи-өлкетану музейінде Дүниежүзі қазақтары қауымдастығының Қостанай облыстық филиалымен бірлескен «Достықта жоқ шекара» атты іс-шара өтті.
1992 жылдың қыркүйек айында Алматы қаласында тұңғыш рет әлем қазақтарының құрылтайы өтіп, сол құрылтайда шетелдердегі қазақ диаспораларымен жұмыс істейтін қауымдастық құрылды. 33 мемлекеттен келген делегация Дүниежүзі қазақтары қауымдастығына Төралқа төрағасы етіп Н.Ә. Назарбаевты сайлады.
Дүниежүзі қазақтарының қауымдастығы – қоғамдық ұйым. Бұл ұйымның жұмысы тағдыр тәлкегімен шекара сызығының ар жағында қалған қазақ диаспорасының қал-жағдайын, арманы мен үмітін мемлекеттік ұйымдарға жеткізетін, мәселелері болса шешуге ат салысатын, барып-келуге жағдай туғызатын алтын көпір іспетті.
Осыдан 10 жыл бұрын Қауымдастық шекаралық облыстарда өз филиалдарын ашты. Қазіргі кезде Павлодар, Өскемен, Петропавл, Орал, Атырау, Шымкент, Талдықорған, Ақтөбе, Қостанай қалаларында қауымдастық бөлімшелері жұмыс істеп жатыр.
Іс-шара қонағы Дүниежүзі қазақтары қауымдастығының Қостанай облыстық филиалының басшысы Нәзира Қыпшақбайқызы Жәрімбетова қауымдастықтың құрылу тарихы және оның осы уақытқа дейін атқарған іс-шаралары, шет елдердегі қазақ диаспораларымен байланысы жайлы әңгіме қозғады.
