2026 жылғы 10 сәуірде Қостанай облыстық тарихи-өлкетану музейінің бейнелеу өнері бөлімінің экспозиция залында белгілі қостанайлық суретші-қолөнер шебері, ҚР Суретшілер одағының мүшесі Светлана Ивановна Шалунованың дербес көрмесі ашылды. Көрмеде автордың кескіндеме және сәндік-қолданбалы өнер туындыларынан тұратын 43 жұмысы ұсынылған. Светлана Ивановнаның көптеген картиналары қостанайлық көрермендерге бұрынғы көрмелерден жақсы таныс, алайда бұл жолы автор жаңа жұмыстарын да ұсынды. Светлана Шалунованың шығармашылығы көпқырлы: ол майлы бояу техникасында да, құрғақ жүн басу (фелтинг) техникасында да жұмыс істейді. Автордың барлық жұмыстарын қанық, көп түсті палитра біріктіреді. Жұмыстарының тақырыбы алуан түрлі: табиғаттың қайталанбас сұлулығы мен тұрмыстық көріністерден бастап, қазақтың ұлттық дәстүрлеріне деген терең қызығушылық пен туған жерге деген сүйіспеншілікке дейін қамтиды. Оның жұмыстарында қоршаған ортаға деген эстетикалық көзқарас қана емес, өмірге деген терең философиялық пайым да көрініс тапқан. Бұл «Шағыртікен», «Савушкин шіркеуі», «Қазақстандағы көктем», сондай-ақ «Шаңырақ-1» және «Шаңырақ-2» триптихтерінде айқын байқалады. Светлана Шалунованың әрбір жұмысы - автордың жан дүниесінің нұрымен шуақтанған және өмірге деген құштарлық энергиясына толы ғажайып әлем. Көрмеде суретшінің ұлы - 2024 жылы мезгілсіз қайтыс болған атақты қостанайлық шебер Дмитрий Александрович Шалуновтың ағаш пен металға көркем өрнек салу техникасында орындалған 19 жұмысы ерекше орын алды. Оның жұмыстары көрменің жалпы тұжырымдамасына табиғи түрде үйлесіп, оған көркемдік тұтастық береді.