Наурыз - қазақтар мен Азияның көптеген халықтарында бес мың жылдан астам уақыт бойы тойланып келе жатқан жылдың басты мерекесі. Бұл көктем мерекесі, табиғаттың жандануы мен жаңа өмір бастауы. Шығыс күнтізбесі бойынша бұл көктемгі күн мен түннің теңелуіне сәйкес келеді. Наурыз мейрамы әрқашанда көптеген дәстүрлі әдет-ғұрыптармен, балуандар сайысымен, суырып салма ақындар айтысымен, ұлттық ойындармен өтеді. Жастар алтыбақанның жанына жиналып, көңіл көтереді.

Осы тамаша мерекенің дәстүрлерін сақтай отырып, Қостанай облыстық тарихи-өлкетану музейі Qostanay телеарнасымен бірлесіп «Наурыз шуағы» - этнографиялық интерактивті жобасын өткізді. Қала тұрғындары мен қонақтары қазақтың ұлттық ойындарына қатысты. Киіз үйде қазақ халқының сәндік-қолданбалы қолөнерінің түрлері: жүн сабау, ұршық иіру, кілем тоқу көрсетілді.

Қонақжай қазақ халқының дәстүрі бойынша барлық қонақтар бауырсақтан дәм татты.

Мереке барысында қазақтың халық әндері орындалды.