1 мамыр – Қазақстан халқының бірлігі күні. Бұл еліміздегі ең жарқын және мерейлі мейрамдардың бірі. Қазақстан аумағында тұрып жатқан 150-ден астам ұлт пен ұлыс өкілдерінің киелі қара шаңырақта тату-тәтті өмір сүруі үшін береке мен ынтымақ, бірлік пен бейбітшілік аса қажет. Сондықтан  бұл мейрамның маңызы зор.

Бүгін, мереке қарсаңында Қостанай облыстық тарихи-өлкетану музейі «Шаңырақ шаттығы» атты  этнографиялық жоба өткізді. Шараға Қостанай облысының этномәдени бірлестіктерінің өкілдері қатысты. Олар өздерінің өнерлерімен қатысушыларға тамаша, жарқын әсер қалдырды. «Ахыска» түрік этномәдени бірлестігінің қауымдастығында әр түрлі ұлт өкілдерінің балалары  лезгинка және басқа да әдемі кавказ билерін үйренетін «Кішкентай қыран» бишілер тобы бар, бүгінгі шарада олар көрермен назарына «Лезгинка» биін ұсынды,  «Дуслык» татар-башқұрт этномәдени бірлестігінің өкілі өз халқының тарихына тоқталып, «Сабантуй» салт-дәстүрін көрсетті. Сондай-ақ «Тарлан» хореографиялық ансамблі қонақтарды қазақ халық биімен қуантты.