Бүгін Қостанай облыстық тарихи-өлкетану музейінің қоры бірегей құжатпен – қаламыздың алғашқы жоспарларының бірінің көшірмесімен толықтырылды. 

1896 жылы жазылған бұл картаны филология ғылымдарының докторы, А.Байтұрсынов атындағы ҚӨУ-нің қоғамдық-гуманитарлық пәндер кафедрасының профессоры Әбсадық Алмасбек Ахметұлы Санкт-Петербург қаласындағы Ресей мемлекеттік тарихи архивінен тапқан.

Орман ведомствосының аға топографы аула кеңесшісі Белоглазов жасаған жоспарда қаланың нақты сызбасы берілген, ал сипаттамада халық саны, қоғамның таптық құрылымы, жер телімдерінің көлемі туралы толық мәліметтер жазылған.

Карта қазірдің өзінде «Қостанай қаласының құрылу тарихы» залында құрметті орынға ие болды және музейдің барлық келушілері үшін қолжетімді.