2016 жылы көрнекті ғалым, қоғам қайраткері, қазақ тарих ғылымындағы жарқын, биік тұлғалардың бірі Манаш Қабашұлы Қозыбаевтың туылғанына 85 жыл толады. Ғалым Қазақстан тәуелсіздігінің он жылы ішінде еліміздің өткен тарихын, қазіргі қоғамдық-әлеуметтік жағдайын ақиқат тұрғысында саралауға зор үлес қосты. Қазақ жұртына өз тарихын тереңірек түсінуге көмектесті.
Қостанай облыстық тарихи-өлкетану музейінде 2016 жылдың 11-қарашасында ғалымның мерейтойына орай «Тарихтағы тұлға» атты портрет-кеш өтті.
Іс-шарада тарих көшбасшысының өмір жолы, ғылыми мұралары туралы естеліктермен тарих ғылымдарының докторы, ҚМПИ профессоры Аманжол Күзембайұлы, тарих ғылымдарының кандидаты, ҚМПИ доценті Өтеген Ихсанұлы Исенов, тарих ғылымдарының кандидаты Айбек Батырханұлы Шалғынбеков, Л.Толстой атындағы облыстық әмбебап ғылыми кітапханасының қызметкері Әсел Балғабайқызы Назарова бөлісті.
Кешке шақырылған ЖОО студенттері музей қорындағы академик М.Қ.Қозыбаевтың жеке заттарымен танысты және оның өмірі жайлы құжатты фильмді көріп тамашалады.
