Қазақстан - 150-ден астам ұлт пен ұлыс тату-тәтті тұрып жатқан көп ұлтты ел. Осы халықтарды біріктіру үшін ел үкіметі түрлі шаралар өткізеді.
Биылғы жылы қазақстандықтар 1 наурызда алғашқы рет - Алғыс айту күнін атап өтеді. Қазақстан Республикасының Президенті Нұрсұлтан Назарбаев 2015 жылы сәуірде Қазақстан халқы Ассамблеясының ХХІІ сессиясында Қазақстан халқы Ассамблеясы құрылған күн - 1 наурызды жыл сайын «барлық этностардың бір біріне және мейірбандық танытып, ол адамдарды өз туғанындай қабылдаған қазақтарға алғыс айту күні ретінде» атап өтуді ұсынған еді.
Қостанай облыстық тарихи-өлкетану мұражайында 26 ақпанда облыстық Қазақстан халқы ассамблеясының этномәдени бірлестіктері өкілдерінің қатысуымен «Туған жерге және халыққа алғыс» атты мұражайлық мейрам өткізілді.
Іс-шара барысында мейрамның шығу тарихы, елімізде бейбітшілікте өмір сүруге қажетті төзімді дүниетаным және келісім туралы сөз болды. Дуслык» татар-башқұрт ЭМБ өкілдері, «Шарк» тәжік-өзбек ЭМБ өкілдері қонақтарға Қазақстан жерінде тұрып жатқан өз халқының тарихы, ұлттық салт-дәстүрлері туралы айтып берді.
