2013 жылдың 30 мамырында Қостанай облыстық тарихи-өлкетану мұражайында Саяси қуғын-сүргін құрбандарын еске алу күніне орай «Қасіретті жылдар естелігі» атты кеш өтті. Қостанай пединститутының және медициналық колледжінің студенттері алдында республикалық «Құқықтық Қазақстан үшін» азаматтық қозғалысы облыстық филиалының өкілдері, қуғын-сүргінге ұшыраған қостанайлықтар туралы кітап авторлары ҰҚК-нің отставкадағы генерал-майоры М.Ю.Дәуенов және ҰҚК-нің отставкадағы подполковнигі Ғ.Н.Мәулетов сөз сөйледі. Репрессия жылдарының тауқыметін тартқан туыстары жайында С. П. Борзенкова естелік айтты.

Аталған тақырыптағы мұражайдың іздестіру-зерттеу жұмыстары жөнінде тарихи-экспозициялық бөлімнің меңгерушісі В.А. Федоренко әңгімеледі. Мұражай қорындағы материалдардан 1930 – 1950 жылдардағы саяси қуғын-сүргін туралы «Енді құпия емес» атты көрме қойылды. Кеш барысында мұражай және мұрағат қорынан алынған фотосуреттер мен құжаттардың компьтерлік тұсаукесері көрсетілді.