Хакас әйелдерінің ерекше әшекейлерінің бірі көкірекше – пого. Жартылай сфералық көкірекше моншақтармен және ұсақ маржандармен кестелеп жасалған, ортасында маржаны бар дөңгелек перламутр жапсырмамен көмкерілген. Дөңгелекті бойлай шашақпен безендірілген. Қатты негізі көкірекше пішінінде қиып алынған бірнеше мата кесектерін өзара клейстермен желімдеп біріктіру арқылы жасалған.

Осындай әйелдерге арналған көкірекшені дайындау барысында ежелгі міндетті әдептің бірі – моншақ немесе маржандармен жиектелген перламутр жапсырмалардың саны тақ (үш, бес, сирек – жеті) болуы тиіс және осы күнге дейін сақталған. Перламутр жапсырмалар нәзік тілімшелермен, дөңгелек немесе сопақ түймелермен ауыстыруы мүмкін.  Бірақ дөңгелектердің тақ санды болуы өзгеріссіз қалады.   

Пого адам өміріндегі ең маңызды оқиғамен – некеге тұру, отбасын құрумен байланысты. Погоны  тұрмысқа шыққан, көп балалы әйелдер киеді. Погоны анасы қызы тұрмысқа шыққанға дейін дайындайтын болған, кейде погоны үйлену тойынан кейін өз әйеліне арнап күйеуі де дайындаған. 

Самайлық әшекейлер ірі моншақтар мен маржандар тізбегінен шашақ түрінде жасалып, бастағы лентаға бекітіледі. Мейрам кезінде тұрмыстағы әйелдер мен құдағилар сырғадан басқа алты үлкен немесе жеті кішкентай маржандардан тұратын осындай  самайлық салпыншақтарды жұптап тағатын болған. Маржандардың арасына күміс тілімшелер қосқан, салпыншақтар күміс тиындармен аяқталып, жібек шашақтармен безендірілген.