Ақын, Қазақстан жазушылар Одағының мүшесі, Қазақстан Республикасының мәдениет қайраткері, филология ғылымдарының кандидаты Нағашыбай Мұқатовтың 70 жасқа толу мерейтойына орай Қостанай облыстық тарихи-өлкетану музейі «Өлеңі - өмір айнасы» атты портрет-кеш өткізді. Кешке мерейтой иесі Н.О.Мұқатов және қостанайлық ақын-жазушылар, А.Байтұрсынов атындағы ҚМУ студенттері қатысты. Ерекше жылы ортада өткен кеш барысында қазақтың қара сөзінің қадірін жетік меңгерген ақын Нағашыбай Оразбайұлының шығармашылығы дәріптелді. Музей директоры Үміт Бламбекқызы ақынды меретойымен құттықтады. Кештің арнайы қонағы ақын Ғұмар Ахметчин мерейтой иесінің журналистика саласындағы еңбегі жайында қызықты мәліметтер айтты, танымал әнші-композитор Қалибек Деріпсалдиннің орындауындағы Нағашыбай Оразбайұлының өлеңіне жазылған әндері кештің ажарын ашты. Кеш соңында жас буын Н.Мұқатовтың фотосуреттері, түрлі басылымдары, марапаттары қойылған шағын көрмемен танысты.