Бүгін Қостанай облыстық тарихи-өлкетану музейінде көрнекті жазушы, драматург, журналист, қоғам қайраткері Бейімбет Майлиннің туғанына 130 жыл толуына арналған «Б. Майлиннің әдеби шығармашылығы мен тағдыр жолы» атты дөңгелек үстел өтті. Дөңгелек үстел барысында сан қырлы талант иесі Б.Майлиннің өмірі мен қоғамдық қызметі, шығармашылық жолы, журналистік қыры, саяси қуғын-сүргінге ұшыраған қазақ зиялылары туралы сөз қозғалды. ҚР білім беру саласының құрметті қызметкері Пиалаш Сүйінкина, журналист Оразалы Жақсанов, А. Байтұрсынұлы атындағы Қостанай өңірлік университетінің оқытушысы Серікжан Исмаилов, Қостанай облыстық тарихи-өлкетану музейінің ғылыми хатшы Н.Оташева және  Рудный қаласы білім бөлімінің Бейімбет Майлин атындағы №7 мектеп-гимназиясының мұғалімі Салтанат Мурзагалиева, QAZBILIM ұлттық лицейінің оқушылары  баяндама жасады. Н.Островский атындағы қалалық кітапхананың қызметкерлері Б.Майлиннің өмірі мен шығармашылығынабайланысты кітап көрмесін ұйымдастырды. Іс-шара соңында қатысушыларға алғыс хат табысталды.